Rom 5 | KYG | STEP | Lagesa afita fatago hu'nonageno'ae'mo Goti'a, naulagale'mo fatago vaya'mo mai'nae, huno laha pai'nigeta afitetae'mo, aipamo falu huno nelate, huta huteta mai'nonageno'ae'mo Ala kava netimo Yesu Kalaisiteti'mo laipamo'mo falu nehiye.

Romans 5

Goti'a, naulagale'mo fatago vaya'mo mai'nae, huno laha pai'nigeta alagepa huta mai'nona gemae

1 Lagesa afita fatago hu'nonageno'ae'mo Goti'a, naulagale'mo fatago vaya'mo mai'nae, huno laha pai'nigeta afitetae'mo, aipamo falu huno nelate, huta huteta mai'nonageno'ae'mo Ala kava netimo Yesu Kalaisiteti'mo laipamo'mo falu nehiye. 2 Agaeteti'mo lagesa afita fatago hu'nona kavateti'mo faleta haiteta Goti'a fiku laha maeno nelamiya kava'afi'mo mai'netae'mo, Goti ha le konali hetamatimo aligune, huta lavayagunagu huta agava ne'maune. 3 Afole aisiya kavafeke'mo lamogaga no'auna'monanafa hanageke ya'e'mo ali'netae'mo lamogaga ne'aune. Ani hanageke yateti'mo laha maesiyafe'mo o'ataleta atafauta alagi huta mai'nisunageno'ae'mo lokiya vaino lategaiye, huta ago afi'nona'mofe'mo lamogaga ne'aune. 4 O'ataleta atafauta alagi huta ne'maisunageno'ae'mo amuse huno latesigeta lavayagunagu huta agava maigune. 5 Goti'a aote Auneme'amo alino lami'nigeno Auneme'amo'mo Goti'a lagaefe'mo hau ayamopafi'mo hau'niya kava'amo laipafi'mo ago alino laki male'niye. Laki'nigeta age'nona'mofe'mo lavayagunagu nehuta agava ne'mauna kavatefe'mo laipamo'mo kana hisigeno hosu laipamo okaligiye.

6 Hau'niya kavatefe'mo layamufamo o'valeta Gotife'mo mono osuta hosu kava'mo nehuna vaya'mogitalefe'mo Goti'a lekana pai male'niya afina'mo Kalaisi'mo ago falino late'niye. 7 Mago vaya'mogimo ke'aepa gemo akame nehaya vaya'mo hapa maesayafe'mo fali'a o'apategaya'monanafa magoke magoke vaya'mogimo alagepa hu'a hapa ne'maya vaya'mo hapa maesayafe'mo koli osu'a fali'a apategae. 8 Fali'a apategaya'monanafa hosu kava'mo nehuna vaya'mo mai'nonageno'ae'mo Kalaisi'a falino late'niya kavateti'mo Goti'a lagaefe'mo hau ayamopafi'mo hau'niya kava'amo ago alino lave neliye. 9 Goti'a kola'amo aino lakino late'niya kavatetike'mo, naulagale'mo fatago vaya'mo mai'nae, huno laha pai'niya'mofe'mo Goti'a mago'e huno laha maeno aipamo leno nelateya kayo'mo lamisiya kavategati'mo lagufamo alino katino lategaiye. 10 Goti kame'amo mai'nonageno'ae'mo mafa'ne'amo fali'niya kavateti'mo alino ao ya'mo hu male'niya'mofe'mo ao vaya'amo mai'nonageno'ae'mo mafa'ne'amo he tino afa'a mai'niya himamu'aleti'mo mago'e huno lagufamo alino katino lategaiye. 11 Mani alagepa kava'age'mo lagaetegamo afole o'aigifa hemeni'e'mo Ala kava netimo Yesu Kalaisiteti'mo Gotife'mo amuse huta ateteta lamogaga ne'aune. Goti'a agaeteti'mo ago alino ao ya'mo hu male'niya'mofe'mae.

Atamu'e Kalaisi'efe'mo anava gemo hu'niya gemae

12 Inagi hosu kava'mo magoke vekafati'mo muki ma mopafi'mo afole ai'nigeno ani hosu kava'aleti'mo nefaliya kava'mo afole ai'niye. Nefaliya kava'mo ani katetike'mo afole aiteno muki vaya'aitegamo aino atagu faeno uneno hu'niye. Muki vaya'amogimo magoke vekamo'a hosu kava'mo hu'niya afina'mo agaepi'mo mai'ne'apae'mo hosu kava'mo hu'naya'mofe'mae. 13 Vaya'mogi hosu kava'mo hume hume ne'ageno'ae'mo Mosese'a ke'aepa gemo alino apami'niye. Ani hogote afina'mo ke'aepa gemo alagi ohane'niyesinana Goti'a vai'mo no'apamiyesine. 14 Nefaliya kava'mo'a Atamu'a mai'niya afinateti'mo muki vaya'aite'mo yagaino apateme apateme ne'egeno'ae'mo Mosese'a afole ai'niye. Goti'a ke'aepa ge'amo Atamufe'mo, ina kava'mo osuvo, huno ha pai'niya ge'amo ago amagino atale'niya kava hu'a ani agufa ke'aepa ge'amo amagi'a o'atale'naya'monanafa fali'nae. Atamu'mo afole aigiye, hu'a ava gemo hu'a avo kae male'naya vekagana huno aune'amo mai'niye. 15 Mai'niya'monanafa Goti'a magoke vekaleti'mo fiku hapa maeno ne'apamiya kava'e mago alu vekamo'a hosu kava'amo'e'mo alu kava alu kava'mo hane'na'ae. Magoke vekamo hosu kava'aleti'mo muki asole vaya'mo fali'naya'monanafa Goti'a magoke vekamo Yesu Kalaisiteti'mo asole vaya'mo fiku hapa maeno ne'apamiya kava'amo'mo mago'e huno ago aeno agase'niye. 16 Goti'a fiku hapa maeno ne'apamiya kavateti'mo alino afole aino ne'ateya kava'e magoke vekamo'a hu'niya kavateti'mo alino afole aino ne'ateya kava'e'mo alu kava alu kava'mo hane'na'ae. Magoke hosu kava'amo akamelegati'mo Goti'a, hosu vaya'mo mai'nae, huno agoti huno apate'niya'monanafa vaya'mogi asole hosu kava'apimo akamelegati'mo Goti'a fiku hapa maeno apamiteno'ae'mo, naulagale'mo fatago vaya'mo mai'nae, huno nehiye. 17 Magoke vekamo hosu kava'aleti'mo nefaliya kava'mo afole aiteno aeno apakaseno yagaino apate'niya'monanafa Goti'a mago'e huno mani kava'mo ago aeno agase'niye. Goti'a fatago kava'amo fiku hapa maeno apami'nisiya vaya'mogimo magoke vekamo Yesu Kalaisiteti'mo ae'a apakase'a alagepa hu'a maige maige hu'a maigae. 18 Mani avo'mo nekaova gemo aepa'amo hane'niye. Magoke vekamo'mo hosu kava'mo hu'nigeno'ae'mo Goti'a, hosu vaya'mo mai'nayanagetapa alagi faligae, huno hu'niya kava huno magoke vekamo'mo fatago kava'aleti'mo Goti'a muki vaya'mo fiku hapa maeno apamiteno'ae'mo, naulagale'mo fatago vaya'mo mai'nayanagetapa alagepa hutapa maige maige hutapa maigae, huno hapa pai'niye. 19 Magoke vekamo'mo Goti ge'amo amagino atale'niya kava'aleti'mo Goti'a asole vaya'aife'mo, hosu vaya'mo mai'nae, huno hu'niya kava huno magoke vekamo'mo ge'amo akame hu'niya kava'aleti'mo asole vaya'aife'mo, naulagale'mo fatago vaya'mo mai'nae, huno hugiye. 20 Mago'e gemo hane'niyana Goti'a hosu kava'mo mago'e huno afole aisiyafe'mo ke'aepa ge'amo'a hosu kava'mo haopale'mo alino afole aino ate'niye. Hosu kava'mo mago'e huno afole ai'niya'monanafa Goti'a hosu kava'mo ago afole ai'niya yategamo fiku hapa maeno apami'niya kava'amo'a mago'e huno aeno agaseno havai teteno aino vali lamino asagauno ai'niye. 21 Hosu kava'mo'a nefaliya kava'mo alino afole aino ateteno ani kavateti'mo yagaino ne'apateya kava huno fiku hapa maeno ne'apamiya kava'mo'a fatago kava'aleti'mo yagaino ne'apatesige'a Ala kava netimo Yesu Kalaisiteti'mo alagepa hu'a maige maige hu'a maisaya ya'mo alino apamisiyafe'mae.